ما يحدث في البلاد فزوره تحتاج إلى حل؛ ايش رأيكم تخلوها فزوة رمضان؟!

الدنيا معصوده عصيد ولا درينا من عصدها, هم عليهم يعصدوا واحنا نأكل, حسبنا الله ونعم الوكيل..

حروب تبدأ بمجازر وتنتهي بصلح وبعد الصلح ترجع المجازر وبعدها صلح وهكذا لوما يكملوا العباد وتخرب البلاد.

يا جماعه نحن عانينا من سياسة التخدير سنين وكانت سبب كل الخراب الذي حلّ بنا, فرجاءً حددوا مواقع الخلل وأماكن العلل واستأصلوا الأورام الخبيثة..

حجر وسيري سايره

            والحرب فينا دايرة

أصحاب عمران وقفوا

          وسيؤون قامت فايرة

وشبوة وأبين عادهم

           الحرب فيهم ثايرة

حوثي وتنظيم قاعدة

           يشتوا بلادي خاسرة

يتداولوا في قتلنا

           والناس صارت حايرة

يا عبدربه قل لنا

           أين الدفاع والطائرة

ليش التمرد عندنا

            عدى خطوط الدايرة

حوثي بيقتل جندنا

           ويهدم مساجد عامرة

قد فجروا دور الحديث

            والدولة صارت عاثرة

والقاعدة نفس الخبر

            هي ضدنا متآمرة

والشعب ودف بينهم

         والعسكري ماسك سرة

أما الحكومة حقنا

            أوراقها متناثرة

الأغلبية منهم

            يشتي بلاد مدمرة

والبعض ساكت مرتضي

          خايف على راس المرة

والبعض يفرض هيبته

            يشتي بلادي عامرة

ياااااااارب فرجها على

         شعبي وننهي المسخرة

الشاعر/منصور المرشحي