هيا ابهوا بس تقولوا ليش الجيل هادا عنيف واتكالي وسريع الدوبان في بوتقه الإرهاب والا دست الكباب حق الاعلام داك... يعني بالله عليكم مادام المقاعد محدوده في كليات الطب والهندسة ليش تفتحوا المجال لهادا العدد من المسجلين؟! وليش مايكون التسجيل المبدئي مجاني او على الأقل بمبلغ رمزي؟! وكيف تقولوا مفاضلة وتسقطوا الأسماء مره ثانيه؟ طيب انتم عارفين من فين يبدا الخلل؟! يبدا من الغش في امتحانات الثانوية العمياء حق بلادنا، الدي اعتبره أني موسم الغس أو مهرجان الغش، ولو أنكم قدرتم تضبطوا الموضوع في امتحان الثانوية ماكان أتقدم هادا العدد كله. ولو قلت لي: طيب في امتحان قبول: باقول لك: الامر مايسلمش! وانتم اخبر ببلدكم وفيتامينات ( واو وسين وصاد فيبه)...اني اشتي اعرف ليشمايكون في تخصصات فنيه اجتماعية بديله؟! يعني البلد مش محتاجه لفنيين في كل تخصص علمي في جامعاتنا؟!
طيب والمواهب الفطرية الذي يتمتع بها كثير من شبابنا وشاباتنا فين بيكون مصيره لما تتغلق في وجوههم كل أبواب الإبداع؟! طيب لو فرضنا ان هادا الجيل قيمته مهزوزة ومبادئه مش ثابتة ويشتي الربح السريع وجمع الفلوس بس، من بيكون السبب في ظهوره بهاذا الشكل غير اللائق ؟!!اكيد نحنا، الأمهات والآباء والمعلمين والأكاديميين والمجتمع بكل فئاته واطيافه...ليش؟! لان نحنا علمناهم المداية على أصوله، كل شي يجي بالفلوس، بالرشوة، بالإغراءات الرخيصة والعروض القذرة... عشان كذا في منهم من يختصر الطريق ويبند على نفسه باب الطموح ويروح يتعسكر وإلا ينظم لجماعة مفسده أو إرهابيه او يتبلطج فوق عباد الله في الروحة والوجيه.
صححوا مسار التعليم ياويه، البلد مش ناقصة جهل وتجهيل، عاد زمان كنا نقول جل لأنه فطري، لكن الآن تجهيل من صدق لأنه تدخل فيه أدوات ومخططات الله اعلم لافين باتسوق نحنا متل الدواب.
