أو أني فداله الكهرباء حقنا٬ بقت أسده٬ شطوره٬ تسمع الكلام٬ تجلس لاصي ولما تروح ترجع فيسع! بيوتنا منوره٬ والمخادر حقنا مفتوحة للناس الأيام هادي٬ لا نطلب بترول للمولدات ولا نخاف بطارية الطاقة الشمسية تطفي... المهم الدنيا عندنا هادا الموسم سلامات. شفتوا كيف انه نحنا لما نمشي نصحح مسار حياتنا نعرف ولمت مانشتيش نضرب له الطناش. صحيح الموضوع ما يخلاش والأمر مايسلمش من اليدات المفسدة اللي يعجبه البعسسة٬ لكن لو نحنا فتحنا عيوننا وصبينا اهتماماتنا في سياق واحد الذي هو تغليب مصلحه الجماعة على مصلحه الفرد اعتقد أننا باننجز كثير كثير من المشاريع الوطنية واللي على رأسه بناء الإنسان اليمني وإعادة التوازن الإنساني لشخصيته.
طيب دحين كيف تقولوا بالنسبة لرواتب الناس با يرجعنه زي مارجعت الكهرباء؟!!... أخاف يجي الحمئ داك ويقطعنه وارجع أقول: يا فرحة ماتمت خذها الغراب وطار! وقد الغربان عندنا كثير والعاشق الولهان يفرح بالتهم! مش كدا يقولوا؟!! اني بدعي للحكومة هادي حقنا على طريقتي:
اللهم يا خالق النجوم والشمس٬ يا شاهد اليوم والأمس٬ يا من كتبت لهم اللحمة وكتبت علينا العدس٬ يا من سلطت علينا بذنوبنا اليهود والنصارى والفرس... يا رب تهدي الصغار والكبار٬ وتجعل الموت مصير من يشعل النار٬ وتنقذنا من سياسة القط والفأر!... يارب ترزقنا الأمان وتجعل الرخاء لنا عنوان وتسكنها الزن على الاودان والتبعية لفلان أو فلتان! يارب يا معبود تذيل كل خائن جحود خير الوطن لا جعبته وشره للوطن ممدود٬... يارب يا واحد يا موجود يا واجد تكفينا شر كل حاسد يقول مفقود وهو فاقد!
الله يرحم أيام زمان كانوا الناس لما يشخطوا وجوههم قبيلة يقولوا ويفعلوا٬ دحين قد وجوههم شوارع ومخططات سكنية وهم بلا وفا! مليه ايش عاد نقول٬ مش وحده الكهرباء اللي غايبه عن الساحة٬ الكرم المروءة والشهامة والانسانية والقيم القبلية كوووووله مهليش٬ فص ملح وذاب وسط المهاترات والمزايدات والبرامج والمشاريع السياسة الفردية الفاشلة.... والله عاد الشعب هادا عاقل ورزين٬ لو كل واحد فيبهم فكر زي ما يفكروا الكبار بترجع اليمن عش دبايير!
