مجرد ذكر صالات الأعراس هادي يزعجني٬ المسالة ما عاديش مباركه للعروسين والمشاركة بهديه او أصبحت اكبر من كذا بكثير.
صوت ولا صوره تطلب الله بطريقه هبلا٬ تقصقص الأغاني والشيلات والأناشيد وتدخل فيبه أسماء الله الحسنئوالصلاه على رسول الله من باب تحصيل حاصل بطريقه مشوهه. والحاجة التانيه موا٬ نحنا في صالة عرس مش في ملهى ليلي! وبعدين عاد نحنا مسلمين٬ عاد نحنا يمنيين٬ عاد نحنا أصحاب قيم وعادات وتقاليد٬ يعني اسالتكم بالله اذا كل واحده من دونا البنات الشابات المتعريات باتستوي ام٬ ايش ممكن تعلم أولاده وبناته في المستقبل؟!.... يعني يدخل بعقولكم ان كل واحده منهم بتكون مدرسه لاولاده؟!!
يابنتي٬ ياحبيبتي٬ ايشاللىتستفيديه لما تعرض جسمك للنسوان بدا الشكل المخزي٬ المهين للعفهوالانوته؟.... لا تستعجلي على رزقك٬ بكره بايجي ابن الحلال وتلبسي الذي يشتيهو٬ اما هاكدا٬ تتصرفي بقله عقل وقله مسؤوليه عن النفس وتمشي في النادي كانك في عرض أزياء لملابس داخليه٬ لا اااادا كثير بابنتي...كثيييير...
ويعدين ايش الرقصات الشيطانيه هادي؟!! والله اني حسيت بالرعب من الدقهوالرقصه والحركات اللي ماليش أي معنى٬ لاكلمات ولا لحن٬ أصوات الدسوت المشقدفه حق جدتي احسن من دا اللحن الهزيل الاحمق.
وكله كوم والنسوان الكبيره كوم تاني٬ صور على الفاضي والمليان٬ سيلفي مع ابليس وسيلفي مع اعوانه! طيب استحوا قليل ياحريم مش كدا٬ ايش خليتم للبنات الصغار؟!!!... اووو...صبغات وعدسات والوان مبهدله وموديلات مطعفره... خلاص خلوني اسكت احسن٬ من صدق كلام الرجال لما يقولوا: الحريم وجع قلب! اني اعترف انهم من صدق وجع قلب ادا ماثربواواتعلمواوعرفوا الصح من الغلط٬ والذي يستوي من الدي مايستويش... دحين الحريم دونا بيقولواعلى مش عاقله... بس خليهم يقولوا... اجنن على حق ولا اجنن على باطل.
