جسر الموت دا أحسن اسم ممكن نطلقه على جسر الخور، بعد عدة حوادث حصلت مؤخرا وبعد ما صار الجسر بدون رادار مراقبة. انا والله مش داريه ليس السواقين دوم يجو لا فوق الجسر يتقلبوا فراشات!
مله وكيف؟!! فين الجهات المسؤولة؟!! فين المرور؟! فين نقابة السواقين؟! بس شاطرين يبكروا شريعه ومشاكل من صباح الصبح على طوابير الفرزة والفكه حق البيس والمندوبين اللى يقلبوا صور تفجع الجن؟.
وقفوا المهزلة دي، أرواح الناس مش لعبه، حاولوا تكونوا متحضرين. كفأيه، ماتنتظروش لما الحكومة تفرض عليكم قوانين قيادة وسير وام الجن، الحكومة مشغولة بأمور أكبر من كذا، شبعنا هدره ولوك ووعود كذابه، خلاص حوادث الجسر أصبحت أشهر من نار على علم. تخبوها ليش، وتغضوا الطرف عنها ليش؟! الذي يرحوا على الجسر بشر من لحم ودم مش دجاج كيني من حق دي الأيام.
تخيلوا ان اولادي يتواصلوا معي يوميا قبل عبور الجسر وبعد عبوره الصباح والظهر عشان يطمنوا أنى وصلت بالسلامة.. وتخيلوا كمان أنى اقرا المعوذات وياسين وما تيسر حفظه من القران من اول لحظه اثناء عبور الجسر، ياجماعه يكفي رعب، شوفوا لكم حل، بطلوا تختلفوا على (مربط العنز) وتتركوا(الحمار) وتمسكوا في (البردعه)...الوضع مايتحملش اهمال وسقله لان الثمن أرواح الناس.
مله على الأقل افتحوا باب تقديم الشكاوى والبلاغات عبر النقابة لان الامر سهل التعميم بعدها على الفرزات ومن هنا ممكن نعمل شوية ضبط ورقابة، وزي ماقال المثل: العيار الذي مايصيبش يدوش... والمهم مايكونش عيار ثقيل!...
ويضحك الذي يجي يقول: جسر الخور (مسكون) عشان كذا تكثر عليه الحوادث... ايش قده مثلث برمودا ونحنا مش داريه.
