طيب فهمنا أنكم فرحانين ومقشننين وتشتوا تعيشوا اللحظة، بس دا مش معناه أنكم تؤذوا الناس وتفزعوهم، أفراحكم ممكن تكون أحزان لناس تانيين اذا بتستمر ثقافة الأعراس عندنا على هذا الشكل.
العاب نارية تقول عيد التحرير!... مليه مش كذا يا جماعة مش أول ولا آخر ناس تتعروسوا، وبعدين العبرة مش بالقراح دا كله، العبرة بالتفاهم والاحترام والتضحية بين الزوجين عشان تستمر الحياة..
وياريت ألعاب نارية خطيرة وبس، أعيرة نارية خفيفة ومتوسطة تحسسني أنهم حياخذوا العروسة من ثكنة عسكرية مش من صالة العرس أو من بيت أمها.. أو كانه العروس مطلوب أمنيا مش وليد شباب يشتي يفرح بنفسه.. آخر موضة كان إطلاق أعيرة نارية من شرفة أحد الفنادق في عدن تعبيرا عن الفرحة الغامرة بالعروسين !!!
طيب يا جماعة نحنا نتكلم عن مجتمع مدني متحضر، وعن قانون أمني يحمي حياة المواطنين، وعن رؤية أمنية اجتماعية جديدة تحقق العدالة الإنسانية مش تبطح أبو القانون وتدعس أمه... يعني خذوها بالعقل كذا:
أيش الفرق بيننا وبين أصحاب الكهوف الظلامية الذين عاثوا في أرض الوطن فساداً بكل المقاييس؟! إذا كان عندنا نفس ثقافة العنف ونفس نظرة الدونية للناس العزل من السلاح.. أيش الفرق بيننا؟!! طبعا مافيش فرق طالما ونحنا بهادي العقلية المتعفنة...
اتعلموا تفرحوا من غيرنا ما تقتلوا الفرح في قلوب ناس تانيين، الناس مش مجبرين يشاطروك أفراحك العنيفة بدمهم ولا أنت مجبر تعيش أفراحك على حساب الناس التعبانة....
